«Мейірім шуағы – жүрегімнің қуаты» («Тағдырластар» клубына 5 жыл)
Іс – шаралар

Өткізілген орны: Оқу залы

Өткізілген уақыты: 25 ақпан, сағ 11-00.

Іс-шараның мақсаты: кейін зағип болған қыздар мен жігіттерді, өмірде талай қиындықтарды кешіп, биік белестерге жеткен зағип азаматтардың өмір жолдарын көрсете отырып, сондай жастарды ортаға тартып, өзін тастап жібермеу, тағдыр-тауқыметін бірлесіп жеңу.

 

2016 жылдың 25 ақпанында ОҚО арнайы кітапхана шаңырағында «Тағдырластар»  клубының ашылғанына 5 жыл толуына орай мерекелік кеш өтті. Мерекелік кешті жүргізген клуб жетекшісі, кітапхана қызметкері Е.Бакиев. Кешке облыстық өлкетану музейінің филиалы «Ерлік» музейінің меңгерушісі Құдайбергенова Ақмарал Асанқызы, атақты шертпе күйдің шебері Генерал Асқаровтың қызы Табиғат Асқарова және алғашқы «Тағдырластар» клубының ашылуына ұйытқы болып, себепші болған, жастармен жұмыс жасап, қоғамға белсене араласып, өлшеусіз үлес қосып жүрген Катишев Сәбит Полатұлы қонаққа келді. Кеште әртүрлі әңгімелер айтылып, 5 жыл көлемінде атқарылған жұмыстарға, жеткен жетістіктерге біршама шолу жасалып, қызықты ойындар ойнатылды. Мерекелік кешке келген қонақтар кітапхана оқырмандарына, клуб мүшелеріне ақ тілектерін жолдап, қонақ кәде ретінде әсем әндерін тарту етті. «Ерлік» музейінің меңгерушісі А.Құдайбергенова «Бұлқынды жүрек» әнімен кешті ашса, дәстүрлі әнші, ұстаз, республикалық конкурстардың лауреаты Асқарова Табиғат Генералқызы Майлықожаның «Насихат» термесі мен «Тойға тілек» атты әуезді әндерін орындап, көпшіліктің ықыласына бөленді. Катишев Сәбит кейінгі жастарға ақ тілегін жолдап, ақыл кеңесін арнады. Кітапхана директоры Нұрманбетов Бәкір Әбдіұлы келген қонақтарға лебізін білдіріп, алғыс айтып, алға ұмтылып батыл болуға үндеп, кітапханаға жиі келіп тұруға шақыра келе, өзі де ерекше шабыттанып әсем ән шырқады. Кеш барысында белсенді оқырман Умаралиева Мамура «Уақыт» атты жыр оқыды,  Ермаханова Мадина Е.Бакиевтың сөзіне жазылған Төребай Нұржанның «Талпынамын шыңдарға» атты әнін шырқады, Төребай Нұржан өз әнін тарту етті. Кеш соңында клубтың белсенді мүшелерін арнайы номинациялармен марапаттап, сыйлықтар табыстады. Атап айтқанда: Төребай Нұржан «Салмақты сазгер», Умаралиева Мамура «Жыр оқудың жүйрігі», Барлыбаев Жомарт «Қазақтың қайсар жігіті», Үйсімбаева Перизат «Парасат ойдың кемеңгері», Тайыров Рүстем «Жарқын жұлдыз», Ермаханова Мадина «Талантты тұлға», Айнакулов Жарылқасын мен Мухаммадаминова Набира «Жарасымды жұп» және  Катишев Сәбит алғыс хаттармен, ал Сейдазимова Дүрияш құттықтау хатымен марапатталды.  Келген қонақтар да, қатысқан көпшілік те көтеріңкі көңіл күйде тарасты.

 
«Өнерлі әлем падишасы» (Әнші Қ.Сәтмұхамбетованың туғанына 65 жыл)
Іс – шаралар

Өткізілген орны: Оқу залы

Өткізілген уақыты: 24 ақпан, сағ 11-00.

Іс-шараның мақсаты: Оқырмандарға Сәтмұхамбетова Құралайдың сазгерлігі  мен әншілігін терең ұғынып, әндерінің идеясын ашу; сазгердің сал өмірінен мәлімет беру; шығармашылығымен таныстыру; өнер адамдарын құрметтеуге баулу.

Қазақтың кең жазиралы дархан даласы әрдайым әсем әннің құшағында тербеліп, аяулы халқы шаттыққа бөленіп жатады. Осынау ұлан ғайыр өлкемізде қаншама талантты дарынды дара тұлғалы, өнер қайраткерлері өмірге келіп, шығармашылық жолда аянбай тер төгіп, биік белестерден көрініп келеді. Бүгін ОҚО арнайы көзі көрмейтін және әлсіз көретін азаматтарға арналған кітапханада атақты әнші, сазгер Сәтмұхамбетова Құралай Шайзадақызының 65 жылдық мерейтойына арналған автормен кездесу кеші өтті. Кешті кітапхана қызметкері Бөрібекова Әдемі ерекше сезімге бөленген бейнелі қалпымен жүргізді. Кешті өнерге бір табан жақын, шығармашылыққа жаны құштар әнші әпкеміз әсем әнмен өзі ашып берді. Кеш аясында Қ.Сәтмұхамбетованың өмірі мен шығармашылығынан кеңінен ақпараттар берілді. Кеш иесіне көрермендер тарапынан сауалдар толассыз қойылып, мағыналы жауаптар алынды. Семей өлкесінің Абай топырағында өмірге келіп, өмірлік қызметін Шымқалада жалғап, ұл - қыз, немере тәрбиелеп отырған аяулы ана, салиқалы сазгер, дара тұлға көптеген әндерді өмірге әкелген. Өнер иесінің мерейтойында әндерін жаттап өскен кітапхана оқырмандары әпкеміздің алдында орындап шықты. Кітапхана қызметкері, І-топ көз мүгедегі Нүрия Баймұратова «Аппақ гүлдер» әнін шырқаса, кітапханамыздың өнерлі белсенді оқырмандары Барлыбаев Жомарт «Ару ана», Төребай Нұржан жергілікті ақын Ханбибі Есенқараеваның сөзіне жазылған сазгердің «Алтынай» атты әнін орындады. Сонымен қатар, елге есімі белгілі дарынды Темірбаевтар әулетінің перзенті Ержан Темірбаев «Ауылға барамын» әнімен көпшілікті тәнті етті. Кеште әншінің өзі біршама әндер орындап, сазды әуенге сусап келген көрерменнің көңіліне молайым рухани кәусар азық дарытты. Мерекелік кеш күтпеген тосын сыйға да тап болды. Осыдан 30 жыл бұрын талант иесімен бірге №12 мектеп-интернатта қызмет жасасқан көнекөз ұжымдас әріптесі Сарабаев Мұхаммедкерім табысып, дидарласып Бұхар жыраудың термесін орындап, отырған ортаны шылқытып жіберді. Алматы қаласында 65 әннен құралған «Аппақ гүлдер» ән жинағы жарыққа шыққалы тұрған сазгер кеште «Ару ана», «Өрік гүлдегенде», «Сені көргім келеді де тұрады», «Немереме» сынды сазды әуезді әндерін шарықтата шырқады. Жиналған жұрт ерекше көңіл күйге енді. Кеш соңында мерейтойға келген көрермендер қатарында отырған белгілі қоғам қайраткері Жұмамұрат Тұяқбаевтың жары 80-нің сеңгіріне шыққан Сайғана Мәдет апа сөз алып, ақ тілегін жолдап, батасын берді. Тілектер жалғасып Н.Жұмағұлов, Е.Бакиевтер лебізін білдіре келе кітапхана директорының орынбасары Л.Темірбаева арнайы құттықтап, сый-сияпатымен гүл шоқтарын табыстады. Саздың сан алуан сырынан ба, әннің құдіретінен бе, халықтың шексіз ілтипатынан ба, жүзі жарқын, келбеті жап-жас көрінген өнер иесі де кітапхана ұжымы мен оқырмандарына ризашылығын білдіріп естелік суреттерге түсіп тарасты.

 
«Голос советского детства»
Іс – шаралар

19 ақпан, сағ. 11.00 Оңтүстік Қазақстан облысы мәдениет басқармасының көзі көрмейтін және әлсіз көретін азаматтарға арналған кітапханасында орыс ақыны Агния Бартоның 110 жылдық мерейтойына арналған «Голос советского детства» атты шығармашылық кеш өтті. Іс-шараның мақсаты: балалар әдебиетін насихаттау; А.Бартоның шығармашылығымен танысу; оқырмандар үшін позитивті және ізгілік жағдай (атмосфера) жасау. Іс-шараға қатысқандар: зағип және әлсіз көретін оқырмандар, «Үміт» мектеп – интернатының оқушылары, кітапхана қызметкерлері.

 
«Махаббат мүсіншісі»
Іс – шаралар

Өткізілген орны: Оқу залы

Өткізілген уақыты: 16 ақпан, сағ 11-00.

Іс-шараның мақсаты: Б. Нұржекеевтің шығармашылығы туралы мағлұмат беру, оқырмандардың жүректерінде әдебиетке деген сүйіспеншілік сезімін ояту.

 

Жылдан жылға елімізде аталып өтілетін  түрлі іс-шаралар мен мерейтойлар көбейіп келеді. Кітапханамыздың оқырмандары әдебиет саласынан тыс қалмай, рухани азық алу мақсатында, ұлы жазушыларымыздың атаулы күндеріне орай кітапханамызда түрлі іс-шаралар мен жиындар өткізіп тұрамыз. Міне бүгінде кітапхана оқу залына әдеттегідей оқырмандар көп жиналды. Оның ішінде әдебиет саласын сүйіп тыңдайтын тыңдарман қауым.

Іс-шарамыздың бүгінгі тақырыбын сонау алпысыншы жылдары әдебиетке келген ұлы шоғырдың арасында жұлдызы айрықша жарқырап көрінген қаламгерлеріміздің бірі - Бексұлтан Нұржекеевтің 75 жылдығына арнап отырмыз. Жазушының қаламынан шыққан шығармалары шынайы өмірдегі  тағдырлар мен оқиғалардан алынып, барынша шыншылдықпен бейнеленген.

Осы сыршылдығына тәнті болған оқырман қауым оны «Қазақтың Мопассаны» немесе «Махаббат жыршысы» деп тегін атамаса керек. Бексұлтан Нұржекеевтің ең алғаш жазған шығармаларының бірі «Күнәлі махаббат» 1968 жылы жазылған. Сонда жас жазушы небәрі жиырма жеті жаста екен. Өзі газет-журнал маңайында емес, қызуы мол комсомол жұмысының қызметкері болып қызмет етіпті. Кейде қым-қуыт, кейде алашапқын жұмыстың арасында жүріп мынандай  шығарма жазу әрбір жазушының маңдайына бұйыра бермейтін бақыт. Жазу мәнері де өзгешелеу. Әрлеп, сырлап, қызыл сөзге де ұрынбайды. Шығарма тілі  қызықты болғаны соншалық кейіпкерлермен бірге мұңайып, бірге күлесің. Жазушы әйел ана тақырыбын терең бойлап жаза білген. Оларға бекзаттықпен қарай білген. Оның әйел бейнесін сомдаудағы ерекшелігі де осында жатыр. Оған себеп «Белгісіз әйелдің хаты», «Әйел жолы жіңішке» атты шығармаларын алсақ болады. Ол туған өлкесінің қадір-қасиетін жүрегімен сезініп жазған. Шалғынына аунап, асыр салып, суына түсіп, топырағын жалаңаяқ кешкен жердің тау-тасын, өзен-сайларын бір сөзбен айтқанда тамылжыған табиғат суреттерін көз алдыңызға келтіреді.

Кешегі өткен тарихымыз жайлы шығармалары, қазіргі жастарымызды ұлттық патриотизмге тәрбиелейді. Жазушының  тәрбиелік мәні бар шығармаларынан үзінділер оқылып, оқырмандармен мұқият тыңдалды. Кітапхана оқу залында «Махаббат мүсіншісі» атты жазушының 11 томдық шығармалар жинағынан тұратын кітаптары көрмеге қойылып, кітапханамыздың арнайы зағип оқырмандарға қызмет ететіндігінен жазушының дыбысталған кітаптары да тыңдармандар назарына ұсынылды.

 

 

 
«Қазақ поэзиясының – Хантәңірі» (М.Мақатаевтың 85 жылдығына орай І-ІІ топ зағип жастар арасында байқау)
Іс – шаралар

Өткізілген орны: Оқу залы

Өткізілген уақыты: 10 ақпан, сағ 11-00.

Іс-шараның мақсаты: Мұқағали Мақатаевтың ақындық талантын оқушылардың жүрегіне ұялату арқылы поэзияны сүюге, оны бағалай білуге, сыршыл да шыншыл ақын өлеңдерінің мәні мен маңызына үңілдіруге, рухани танымын кеңейтуге ықпал ету.

Ақындарын ардақтап қастерлей білген қасиетті кітапханамызда қазақтың ақиық ақыны М.Мақтаевтың 85 жылдық тойына арналған «Қазақ поэзиясының – Хантәңірі» атты байқау өтті. Байқауға облыстық «Үміт» мектеп-интернатының жоғарғы сынып оқушылары қатысты. Байқауды өткізудегі негізгі мақсат: ақынның өлеңге толы өмірі мен шығармашылығын көпшілік көрерменге кеңінен дәріптей отырып жас таланттарды жарыққа шығарып поэзия әлеміне еркін қанат қағып, әдебиетке деген құштарлығын арттыру болып табылады. Байқауды тифлобөлім меңгерушісі Л.Абжаппарова жүргізді. Сайысқа 4 үміткер  қатысты.

  1. Камал Тоғжан
  2. Пернебай Жандос
  3. Өміртай Әкімжан
  4. Тұрлыбек Мадина

Байқау 4 шарттан құралды. Алғашқы сайыс «Сәлем сөздің атасы» деп аталды, қатысушы өнерпаз өзін-өзі таныстырды, 2 - сайыс «Мұқағали поэзия әлеміне саяхат» ақынның жырларын мәнерлеп, нақышына келтіріп  жатқа оқыу, 3 - сайыс мұзбалақ ақынның сөзіне жазылған әндерді нақышына келтіріп орындау және 4-ші – Мұқағали Мақатаевтың өмірінен қойылатын сұрақтарға толық әрі нақты жауап беру болатын.

Байқауға Оңтүстік Қазақстан облыстық көздері көрмейтін және әлсіз көретін азаматтарға арналған арнайы кітапхана директорының орынбасары Л.Темірбаева, С.Тұрлыбек Қазақстан жазушылар одағының мүшесі, ОҚО жазушылар одағы филиалы төрағасының орынбасары,  Дәркен Танабай белгілі ақын, «Алтын қалам» иегері, «Астана-Бәйтерек» фестивалінің лауреаты және өнерде жүрген ағамыз, кітапханамыздың жанашыры, Оңтүстік өңіріне танымал асаба С.Аймаханов кітапханамызда өткен көптеген іс-шараларға және «Қазақ поэзиясының – Хантәңірі» байқауына демеушілік етіп жүрген ағамыз қазылық етіп төрелік жасады.

Қатысушылар байқауға өте жоғары дайындықпен келіп талапқа сай тапсырмаларды орындап шықты. Байқау барысында «Күрең күз», «Сенің көзің», «Құмған алған», «Сәби болғым келеді» әндері орындалды. Кеш барысында кітапханамыздың белсенді оқырманы І-топ көз мүгедегі, көптеген байқаулардың жеңімпазы Төребай Нұржан «Күрең күз», «Ғашық жүрек» әндерін әуелетсе, «Үміт» мектеп–интернатының 10-сынып оқушысы Батырхан Әсел М.Мақатаевтың «Ғашықпын» өлеңін айтып берді. Ақын жүрегінен нәзіктікке тұнған Отанға, Туған жерге, Анаға, Өмірге деген жалпы тіршілік атаулыға деген шексіз махаббат лебі естілген жырлар туған. Мұқағали Мақатаевтың әрбір шығармашылық кештері, байқаулары мәнді де мазмұнды өтеді. Себебі, ақын ерекше жаратылған тұлға. Кез келген өлеңдерінен қарапайымдылықпен тазалық, адалдықпен шындықты көруге болады. Таланттар ортаға бар талабын салып өнер көрсетті. Байқаудың қортындысын кітапхана директорының орынбасары Л.Темірбаева қортындылады. Қатысушыларға  «Өнерге ғашық жас өрен», «Күміс көмей жез таңдай», «Ойы жүйрік - білімпаз», «Сезімге толы сырлы жыр» атты номинациялармен дипломдар мен ақшалай сыйлықтар тарту етілді. Оқырмандар Мұқағалидың ән, поэзия әлеміне бір сүңгіп, жақсы көңіл-күйде тарқасты.

 

 

 
<< Бірінші < Алдыңғы 1 2 3 4 5 6 7 8 9 10 Келесі > Соңы >>

Страница 10 из 12

ҚР Президентінің Жолдауы

Мемлекет басшысының Қазақстан халқына Жолдауы     ҚАЗАҚСТАН ЖАҢА ЖАҺАНДЫҚ НАҚТЫ АХУАЛДА: ӨСІМ, РЕФОРМАЛАР, ДАМУ Қазақстан Респуб...

ҚР рәміздері

ҚР Мемлекеттік Туы Қазақстан Республикасының мемлекеттiк туы – Қазақстан Республикасының мемлекеттiк негiзгi рәмiздердiң бiр...

Против коррупции
Против коррупции

sound by Jbgmusic