«Арулар асыл жандар, шуақ боп шашылғандар» (8 наурыз Халықаралық әйелдер мейрамы)
Іс – шаралар

Өткізілген орны: Оқу залы

Өткізілген уақыты: 2 наурыз, сағ 11-00.

Іс-шараның мақсаты: Халықаралық әйелдер мерекесі қарсаңында, 6 ақпандағы Елбасымыздың Жолдауындағы ана мен балаға деген қамқорлық және қоғамдағы Ананың орны, «Ана» атымен байланысты қасиетті ұғымдар туралы пікір бөлісу; аналарды, қыз-келіншектерді құрметтеуге шақыру.

 

8 - Наурыз Халықаралық аналар, қыз-келіншектер жалпы арулар мерекесі болып елімізде аталып өтіледі. Осы орайда ОҚО арнайы көзі көрмейтін және әлсіз көретін азаматтарға арналған кітапханада кітапханашылар зағип жанды аналар мен қыз-келіншектерге мерекелік кеш ұйымдастырып, арнайы концерттік бағдарлама тарту етті. Кешті тифлобөлім меңгерушісі Л.Абжаппарова жүргізді. Мерекелік кеште алдымен ҚСҚ төрағасы Н.Алтынбеков сөз алып, келген қонақтарды мерекелерімен құттықтап, барша аруларға бақыт тіледі. Кітапхана директоры Нұрманбетов Бәкір Әбдіұлы тілекті жалғап, аналарға ыстық ықыласты лебізімен әсем әндерден шашу шашып, алғыс білдірді. Мерекелік кеш аясында әуезді әндер шырқалып, анаға деген алғыс пен құрмет көрсетіліп, жүректен өлең жырлар ақтарылды. Мерекелік кеш соңында арнайы кітапхананың және ҚСҚ атынан қызғалдақтай құлпырған аруларға әдемі сый-сыяпаттар табысталып, оларға ұзақ ғұмыр, зор денсаулық, мол бақыт, қажымас қайрат пен мәңгілік сұлулық тілеп,  алғыс білдірілді.

Қазақ халқы қашанда бір қолымен бесікті, бір қолымен әлемді тербеткен аналарды ардақтап, аялай білген халық. Аналарға қандай жақсылық жасасаң да артық етпес. Мерекелік «Арулар асыл жандар шуақ боп шашылғандар» атты кешке келген аналар көктем лебімен тыныстап, ерекше әсерге бөленіп, жарқын жүзбен жадырап тарасты. 80-нен асқан қарт ана Сайғана Мәдет апа жастарға алғысын білдіріп, ақ батасын беріп, ұзақ ғұмыр тілеп, кейінгі буынды отаншыл азамат болуға шақырды. Қариясы бар елдің қазынасы мол демекші, бізде ақ жаулықты аналарымызға ұзақ өмір, бақыт тілеп, ұл-қыз, немерелерінің қызығына бөлене бергей деген тілекпен әкімшілік тарапынан аналарымызға  арнайы сыйлықтар табыс еттік. Мерекеге арналған көрме ұйымдастырылып, көрме сөрелеріне ақындарымыздың аналарға арналған өлеңдері, жыр шұмақтары қойылды.

 
«Ата- бабам аңсаған - Тәуелсіздік!» (Ұлт азаттық көтеріліске - 100 жыл) (Тәуелсіздіктің 25 жылдығына орай)
Іс – шаралар

Өткізілген орны: Оңалту орталығы

Өткізілген уақыты: 26 ақпан, сағ 11-00.

Іс-шараның мақсаты: 1916 жылғы ұлт - азаттық қозғалыстың отаршылдыққа қарсы сипатын түсіндіріп, оның ұлт - азаттық соғысқа ұласқанын фактілермен көрсету, қазақ қоғамының түрлі топтары назарының жалпыұлттық идеяға ұласқанын ашып көрсетіп,  тұтастығын сақтау идеясы болғанын түсіндіру арқылы  отаншылдық  қасиеттерін  шыңдай отырып оқырмандарға насихаттау.

Арнайы кітапхананың «стационардан тыс қызмет көрсету секторының» кітапханашыларының үйымдастыруымен, аталмыш тақырыпқа сай тарихи – танымдылық кеш  өткізілді. 1916 жылғы көтеріліс қазақ халқының сан ғасырлық ұлт-азаттық қозғалысының тарихында ерекше орын алады. Бірінші дүниежүзілік соғыс жағдайларында көтерілістің жалпы жұрт таныған басшылары Ә.Жанбосынов, А.Иманов, Ж.Мәмбетов, Ұ.Саурықов, Б.Әшекеев, О.Шолақов, А.Жүнісов, Қ.Көкембаев, И.Құрманов, Т.Орысов, Ж.Кұдайбергенов, С.Қанаев, М.Ұзақбаев, А.Сұлтанбеков жене басқалар, көтерілісшілердің саяси көсемдері Т.Бокин, Т.Рысқұлов, С.Мендешев, Ә.Жангелдин, Б.Алманов жөне басқалар кезінде Сырым Датов, Исатай Тайманов, Махамбет Өтемісов, Жанқожа Нұрмұхамедов, Кеңесары және Наурызбай Касымовтар, Байзақ Мәмбетов және басқалар жүргізген тәуелсіздік жолындағы күреске халықты көтерді. Оқырмандарымызға осы кештің  барысында 12 минуттық  бейнефильм көрсетілді.  Тәуелсіздігімізді ата – бабамыз бізге аманат- мұра ретінде  қалдырғанын айта отырып, оқырмандарымыз ән айтып, өлеңдерін тарту етті. Шақырылған қонақтар, оңалту орталығында  демалып  жатқан  оқырмандар,  осы  өткен тарихи кешімізге дән ризашылығын білдіріп, ақ тілектерін  айтып тарқасты.

Кітап көрмесі: «Қазақтың өткені сырлы, ертеңі нұрлы!»

Қойылған кітап саны: 16 дана, жазық баспалы әдебиеттер, кіші қалыпты мүсіндер, әдістемелік, бедерлі – графикалық құралдар, баспа материалдары.

Берілгені: 12 дана

 
«Мейірім шуағы – жүрегімнің қуаты» («Тағдырластар» клубына 5 жыл)
Іс – шаралар

Өткізілген орны: Оқу залы

Өткізілген уақыты: 25 ақпан, сағ 11-00.

Іс-шараның мақсаты: кейін зағип болған қыздар мен жігіттерді, өмірде талай қиындықтарды кешіп, биік белестерге жеткен зағип азаматтардың өмір жолдарын көрсете отырып, сондай жастарды ортаға тартып, өзін тастап жібермеу, тағдыр-тауқыметін бірлесіп жеңу.

 

2016 жылдың 25 ақпанында ОҚО арнайы кітапхана шаңырағында «Тағдырластар»  клубының ашылғанына 5 жыл толуына орай мерекелік кеш өтті. Мерекелік кешті жүргізген клуб жетекшісі, кітапхана қызметкері Е.Бакиев. Кешке облыстық өлкетану музейінің филиалы «Ерлік» музейінің меңгерушісі Құдайбергенова Ақмарал Асанқызы, атақты шертпе күйдің шебері Генерал Асқаровтың қызы Табиғат Асқарова және алғашқы «Тағдырластар» клубының ашылуына ұйытқы болып, себепші болған, жастармен жұмыс жасап, қоғамға белсене араласып, өлшеусіз үлес қосып жүрген Катишев Сәбит Полатұлы қонаққа келді. Кеште әртүрлі әңгімелер айтылып, 5 жыл көлемінде атқарылған жұмыстарға, жеткен жетістіктерге біршама шолу жасалып, қызықты ойындар ойнатылды. Мерекелік кешке келген қонақтар кітапхана оқырмандарына, клуб мүшелеріне ақ тілектерін жолдап, қонақ кәде ретінде әсем әндерін тарту етті. «Ерлік» музейінің меңгерушісі А.Құдайбергенова «Бұлқынды жүрек» әнімен кешті ашса, дәстүрлі әнші, ұстаз, республикалық конкурстардың лауреаты Асқарова Табиғат Генералқызы Майлықожаның «Насихат» термесі мен «Тойға тілек» атты әуезді әндерін орындап, көпшіліктің ықыласына бөленді. Катишев Сәбит кейінгі жастарға ақ тілегін жолдап, ақыл кеңесін арнады. Кітапхана директоры Нұрманбетов Бәкір Әбдіұлы келген қонақтарға лебізін білдіріп, алғыс айтып, алға ұмтылып батыл болуға үндеп, кітапханаға жиі келіп тұруға шақыра келе, өзі де ерекше шабыттанып әсем ән шырқады. Кеш барысында белсенді оқырман Умаралиева Мамура «Уақыт» атты жыр оқыды,  Ермаханова Мадина Е.Бакиевтың сөзіне жазылған Төребай Нұржанның «Талпынамын шыңдарға» атты әнін шырқады, Төребай Нұржан өз әнін тарту етті. Кеш соңында клубтың белсенді мүшелерін арнайы номинациялармен марапаттап, сыйлықтар табыстады. Атап айтқанда: Төребай Нұржан «Салмақты сазгер», Умаралиева Мамура «Жыр оқудың жүйрігі», Барлыбаев Жомарт «Қазақтың қайсар жігіті», Үйсімбаева Перизат «Парасат ойдың кемеңгері», Тайыров Рүстем «Жарқын жұлдыз», Ермаханова Мадина «Талантты тұлға», Айнакулов Жарылқасын мен Мухаммадаминова Набира «Жарасымды жұп» және  Катишев Сәбит алғыс хаттармен, ал Сейдазимова Дүрияш құттықтау хатымен марапатталды.  Келген қонақтар да, қатысқан көпшілік те көтеріңкі көңіл күйде тарасты.

 
«Өнерлі әлем падишасы» (Әнші Қ.Сәтмұхамбетованың туғанына 65 жыл)
Іс – шаралар

Өткізілген орны: Оқу залы

Өткізілген уақыты: 24 ақпан, сағ 11-00.

Іс-шараның мақсаты: Оқырмандарға Сәтмұхамбетова Құралайдың сазгерлігі  мен әншілігін терең ұғынып, әндерінің идеясын ашу; сазгердің сал өмірінен мәлімет беру; шығармашылығымен таныстыру; өнер адамдарын құрметтеуге баулу.

Қазақтың кең жазиралы дархан даласы әрдайым әсем әннің құшағында тербеліп, аяулы халқы шаттыққа бөленіп жатады. Осынау ұлан ғайыр өлкемізде қаншама талантты дарынды дара тұлғалы, өнер қайраткерлері өмірге келіп, шығармашылық жолда аянбай тер төгіп, биік белестерден көрініп келеді. Бүгін ОҚО арнайы көзі көрмейтін және әлсіз көретін азаматтарға арналған кітапханада атақты әнші, сазгер Сәтмұхамбетова Құралай Шайзадақызының 65 жылдық мерейтойына арналған автормен кездесу кеші өтті. Кешті кітапхана қызметкері Бөрібекова Әдемі ерекше сезімге бөленген бейнелі қалпымен жүргізді. Кешті өнерге бір табан жақын, шығармашылыққа жаны құштар әнші әпкеміз әсем әнмен өзі ашып берді. Кеш аясында Қ.Сәтмұхамбетованың өмірі мен шығармашылығынан кеңінен ақпараттар берілді. Кеш иесіне көрермендер тарапынан сауалдар толассыз қойылып, мағыналы жауаптар алынды. Семей өлкесінің Абай топырағында өмірге келіп, өмірлік қызметін Шымқалада жалғап, ұл - қыз, немере тәрбиелеп отырған аяулы ана, салиқалы сазгер, дара тұлға көптеген әндерді өмірге әкелген. Өнер иесінің мерейтойында әндерін жаттап өскен кітапхана оқырмандары әпкеміздің алдында орындап шықты. Кітапхана қызметкері, І-топ көз мүгедегі Нүрия Баймұратова «Аппақ гүлдер» әнін шырқаса, кітапханамыздың өнерлі белсенді оқырмандары Барлыбаев Жомарт «Ару ана», Төребай Нұржан жергілікті ақын Ханбибі Есенқараеваның сөзіне жазылған сазгердің «Алтынай» атты әнін орындады. Сонымен қатар, елге есімі белгілі дарынды Темірбаевтар әулетінің перзенті Ержан Темірбаев «Ауылға барамын» әнімен көпшілікті тәнті етті. Кеште әншінің өзі біршама әндер орындап, сазды әуенге сусап келген көрерменнің көңіліне молайым рухани кәусар азық дарытты. Мерекелік кеш күтпеген тосын сыйға да тап болды. Осыдан 30 жыл бұрын талант иесімен бірге №12 мектеп-интернатта қызмет жасасқан көнекөз ұжымдас әріптесі Сарабаев Мұхаммедкерім табысып, дидарласып Бұхар жыраудың термесін орындап, отырған ортаны шылқытып жіберді. Алматы қаласында 65 әннен құралған «Аппақ гүлдер» ән жинағы жарыққа шыққалы тұрған сазгер кеште «Ару ана», «Өрік гүлдегенде», «Сені көргім келеді де тұрады», «Немереме» сынды сазды әуезді әндерін шарықтата шырқады. Жиналған жұрт ерекше көңіл күйге енді. Кеш соңында мерейтойға келген көрермендер қатарында отырған белгілі қоғам қайраткері Жұмамұрат Тұяқбаевтың жары 80-нің сеңгіріне шыққан Сайғана Мәдет апа сөз алып, ақ тілегін жолдап, батасын берді. Тілектер жалғасып Н.Жұмағұлов, Е.Бакиевтер лебізін білдіре келе кітапхана директорының орынбасары Л.Темірбаева арнайы құттықтап, сый-сияпатымен гүл шоқтарын табыстады. Саздың сан алуан сырынан ба, әннің құдіретінен бе, халықтың шексіз ілтипатынан ба, жүзі жарқын, келбеті жап-жас көрінген өнер иесі де кітапхана ұжымы мен оқырмандарына ризашылығын білдіріп естелік суреттерге түсіп тарасты.

 
«Голос советского детства»
Іс – шаралар

19 ақпан, сағ. 11.00 Оңтүстік Қазақстан облысы мәдениет басқармасының көзі көрмейтін және әлсіз көретін азаматтарға арналған кітапханасында орыс ақыны Агния Бартоның 110 жылдық мерейтойына арналған «Голос советского детства» атты шығармашылық кеш өтті. Іс-шараның мақсаты: балалар әдебиетін насихаттау; А.Бартоның шығармашылығымен танысу; оқырмандар үшін позитивті және ізгілік жағдай (атмосфера) жасау. Іс-шараға қатысқандар: зағип және әлсіз көретін оқырмандар, «Үміт» мектеп – интернатының оқушылары, кітапхана қызметкерлері.

 
<< Бірінші < Алдыңғы 1 2 3 4 5 6 7 8 9 10 Келесі > Соңы >>

Страница 9 из 11

ҚР Президентінің Жолдауы

Мемлекет басшысының Қазақстан халқына Жолдауы     ҚАЗАҚСТАН ЖАҢА ЖАҺАНДЫҚ НАҚТЫ АХУАЛДА: ӨСІМ, РЕФОРМАЛАР, ДАМУ Қазақстан Респуб...

ҚР рәміздері

ҚР Мемлекеттік Туы Қазақстан Республикасының мемлекеттiк туы – Қазақстан Республикасының мемлекеттiк негiзгi рәмiздердiң бiр...

Против коррупции
Против коррупции

sound by Jbgmusic